Psalms 68

Kumqondisi wokuhlabelela. ElikaDavida. Ihubo. Ingoma.

1UNkulunkulu kaphakame, izitha zakhe azihlakazwe; izitha zakhe azimbalekele.

2Njengentuthu iphetshulwa ngumoya lawe baphephulele kude; njengengcino encibilikiswa ngumlilo, ababi kababhubhe phambi kukaNkulunkulu.

3Kodwa sekungathi abalungileyo bangajabula bathokoze phambi kukaNkulunkulu; sengathi bangathaba bathokoze.

4Hlabelelani kuNkulunkulu, hlabelelani indumiso ebizweni lakhe, mphakamiseni ohlezi phezu kwamayezi – ibizo lakhe nguJehova – njalo lithokoze phambi kwakhe.

5Uyise wezintandane, umlamuleli wabafelokazi, nguNkulunkulu emzini wakhe ongcwele.

6UNkulunkulu uyabalungisela indawo ezimulini labo abalesizungu, ukhokhela izibotshwa ngokuhlabela; kodwa abahlamuki bahlala elizweni elomileyo.

7Kwathi lapho ukhokhela abantu bakho, O Nkulunkulu, lapho wawudabula elizweni eliyinkangala,

8umhlaba wanyikinyeka, umkhathi walithulula izulu, phambi kukaNkulunkulu, onguYena oweSinayi, phambi kukaNkulunkulu ka-Israyeli.

9Wanisa izulu elinengi, O Nkulunkulu; wavuselela ilifa lakho elaselikhathele.

10Abantu bakho bahlala kulo bazinza, kwathi ngokuphana kwakho, O Nkulunkulu, wabaphakela abangabayanga.

11UJehova walikhupha ilizwi, kwaba labanengi kakhulu abalimemezelayo:

12“Makhosi lamabutho phangisani libaleke; ezihonqweni amadoda abelana impango.

13Khonapho lisalele phakathi kwemililo yezihonqo, izimpiko zejuba lami zihuqiwe ngesiliva, izinsiba zalo ngegolide elikhazimulayo.”

14Lapho uSomandla wawahlakaza amakhosi elizwe, kwakunjengongqoqwane eqoqene phezu kweZalimoni.

15Izintaba zeBhashani yizintaba ezilesithunzi; zilezindongandonga izintaba zaseBhashani.

16Kungani linyonkoloza ngomona, lina zintaba ezindongandonga, leyontaba uNkulunkulu akhetha ukubusa kuyo, lapho uJehova ngokwakhe uzahlala khona lanini?

17Izinqola zikaNkulunkulu zingamatshumi ezinkulungwane; lezinkulungwane zezinkulungwane; uJehova usefikile evela eSinayi wangena endlini yakhe engcwele.

18Wathi ekukhuphukeni kwakho uqansa, wakhokhela abathunjiweyo edwendweni lwakho; wemukela izipho ebantwini, lakulabo abahlamukayo ukuze wena, O Jehova Nkulunkulu, uhlale khona.

19Udumo kalube kuJehova, kuNkulunkulu uMsindisi wethu, othwala imithwalo yethu izinsuku zonke.

20UNkulunkulu wethu nguNkulunkulu osindisayo; kuJehova wobukhosi kuvela ukuphepha ekufeni.

21Ngeqiniso uNkulunkulu uzawachoboza amakhanda ezitha zakhe, imiqhele eloboya yalabo abaqhubekayo ngezono zabo.

22UJehova uthi, “Ngizabaletha besuka eBhashani; ngizabaletha besuka ekujuleni kolwandle,

23ukuze ligxamuze izinyawo zenu egazini lezitha zenu, lezilimi zezinja zenu zibe lesabelo sazo.”

24Udwendwe lwakho seluqhamuka, yebo Jehova, udwendwe lukaNkulunkulu wami leNkosi lungena endlini engcwele.

25Phambili ngabahlabeleli, kulandele abamachacho; phakathi kwabo kulamantombazana atshaya amagedla.

26Dumisani uJehova ebandleni elikhulu; dumisani uJehova embuthanweni ka-Israyeli.

27Masinyane isizwana sakoBhenjamini sibakhokhele, nantiyana ixuku elikhulu lamakhosana kaJuda, njalo nankayana amakhosana kaZebhuluni lakaNafthali.

28Veza amandla akho, O Nkulunkulu, sitshengise amandla akho, O Nkulunkulu, njengalokho owakwenzayo ngaphambili.

29Ngenxa yethempeli lakho eliseJerusalema amakhosi azakulethela izipho.

30Khuza isilo esiphakathi kwemihlanga umhlambi wezinkunzi phakathi kwamathole ezizwe. Sezithotshisiwe kazilethe izibhebhedu zesiliva. Hlakaza izizwe ezithokoza ngempi.

31Amanxusa azavela eGibhithe; iKhushi izazithoba kuNkulunkulu.

32Hlabelelani kuNkulunkulu, hawu lina mibuso yomhlaba, hlabelelani indumiso kuJehova,

33kuye ohlala phezu kwesibhakabhaka sekadeni, okhwaza ngelizwi elikhulu.

34Fakazani ngamandla kaNkulunkulu, obukhosi bakhe buphezu kuka-Israyeli; omandla akhe asesibhakabhakeni.

35Uyamangalisa, O Nkulunkulu, usendlini yakho engcwele; uNkulunkulu ka-Israyeli upha amandla ebantwini bakhe. Indumiso kayibe kuNkulunkulu!